Gilauman ang padayong paghinay sa lihok sa merkado sa cryptocurrency taliwala sa nagpadayong tensyon sa Middle East.
Sumala kang Christian Jay Azucena, usa ka crypto trader ug market analyst, iyang gipahayag nga hinay ang kalihokan sa trading sa pagkakaron. Matod ni Azucena, nagpabiling mabinantayon ang mga traders ug investors, ug posible nga mobalik lamang ang kadasig sa merkado kon mahuman na ang panagbangi sa rehiyon.
Dugang pa niya, niadtong sayong bahin sa Abril, nagpahayag ang mga awtoridad sa Iran nga modawat sila og bayad pinaagi sa cryptocurrency gikan sa mga barko sa lana (oil ships) nga moagi sa Strait of Hormuz.
Sa laing bahin, aduna na matod pay mga barko ang nakabayad gamit ang digital currency, dungan sa anunsyo ni Donald Trump bahin sa pag-freeze sa gibanabana nga 344 million US dollars nga kantidad sa digital assets aron madugangan ang economic pressure batok sa Iran.
Bisan pa niini, apektado usab ang mga lokal nga crypto traders sa Pilipinas tungod sa direksyon nga gisubay sa tibuok kalibutan nga merkado sa cryptocurrency.
Photo courtesy: Philstar
