Sobra sa katunga sa mga Amerikano ang nag-ingon nga nagkagrabe ang ilang pinansyal nga kahimtang, sumala sa bag-ong survey sa Gallup.
Base sa resulta, 55% sa mga Amerikano ang nagtan-aw nga nagkagrabe ang ilang ekonomikanhong sitwasyon karong tuiga. Mas taas kini kumpara sa 53% sa miaging tuig ug 47% sa 2024, nga nagpakita sa padayon nga pagsaka sa mga nagkalisod pinansyal.
Gipakita sa survey, nga kini mao na ang ika-lima ka sunod nga tuig nga mas daghan ang nag-ingon nga nagkagrabe ang ilang kahimtang kaysa sa miarang-arang. Sumala pa sa Gallup, ang sitwasyon karon halos parehas sa panahon sa Great Recession sa 2007 hangtod 2009, diin daghang Amerikano usab ang nakasinati og kalisod sa ekonomiya.
Sa detalye, 62% ang nabalaka nga dili makatigom og pondo para sa pagretiro, samtang 60% ang nagkabalaka sa posibleng gasto sa medikal kung adunay aksidente o grabe nga sakit. Mga 54% usab ang nabalaka sa ilang investment ug sa pagpadayon sa ilang kasamtangang lifestyle.
Dugang pa, hapit katunga ang nabalaka sa regular nga healthcare expenses, 41% sa pagbayad sa buwanang bills, ug 40% sa tuition sa kolehiyo.
Sumala sa Gallup, ang isyu sa affordability mao ang nag-una nga kabalaka karon, ilabi na sa pagsaka sa presyo sa pagkaon, kuryente, balay, healthcare, transportasyon, ug childcare. Giingon usab nga 55% sa mga respondents ang naapektuhan sa inflation, samtang 13% ang nabalaka sa pagsaka sa presyo sa lana ug gasolina.
Photo Courtesy: PNA
