Posibleng mosaka pa ang presyo sa pagkaon sa Pilipinas tungod sa kakulang sa suplay, samtang nagkagamay ang biyahe sa mga lokal nga shipping companies.
Base sa datos nga gihatag sa Philippine Ports Authority (PPA), misaka og 2% ang total cargo volume sa mga pantalan sa nasod ngadto sa 66.96 million metric tons sa unang quarter. Apan, nabantayan ang 3% nga pagkunhod sa domestic cargo ngadto sa 27.47 MMT—nga kasagaran naglangkob og mga produktong pagkaon.
Sumala sa economics professor sa De La Salle University nga si Maria Ella Oplas, ang pagsaka sa presyo sa lana nakaapekto pag-ayo sa lokal nga shipping, rasong napugos sila sa pagminus sa ilang mga biyahe aron makatipid sa gasolina.
Nagpasidaan niini nga sa umaabot nga panahon, mahimong magkulang ang suplay sa pagkaon sa mga lugar nga dili agricultural, sama sa Metro Manila.
Dugay na matud pa nga problema sa Pilipinas ang logistics, ug karon mas nagkagrabe tungod sa taas nga presyo sa lana.
Nagpakita usab ang rekord nga ang mga lokal nga shipping companies nagminus sa ilang biyahe aron makunhuran ang gasto, diin ang shipcalls mikunhod og 1% ngadto sa 163,002 sa unang quarter kumpara sa 164,978 sa miaging tuig.
Photo Courtesy: Philippine Ports Authority
