Nasikop sa National Capital Region Police Office (NCRPO) ang 17 ka mga indibidwal tungod sa giingong ilegal nga pag-refill ug pag-rebrand sa mga tangke sa liquefied petroleum gas (LPG) sa Sta. Quiteria Road sa Caloocan City, kaniadtong Sabado.
Matod sa kapulisan, nasikop ang mga suspek human gi-raid ang compound sa kompanya nga ilang gitrabahoan, pinasikad sa search warrant, nagpahigayon usab og inventory ang mga awtoridad sa mga nakumpiska nga mga ekipo sama sa rebranding ug refilling equipment, walay unod nga tanke sa LPG, pintura, ug usa ka tanker.
Mipartisipar usab sa operasyon ang usa ka representante sa petroleum company. Dugang pa sa NCRPO, mahimong manubag ang mga indibidwal ubos sa Section 43 sa Republic Act 11592 o ang LPG Industry Regulation Act.
Nagpasidaan usab kapolisan nga delikado ang ilegal nga pag-rebrand ug pag-refill sa mga tangke sa LPG tungod kay makamugna kini og sunog ug uban pang peligro kung dili kini motuman sa gitakda nga safety standards sa gobyerno.
Photo Courtesy: NCRPO
