Gipahigayon sa lokal nga kagamhanan sa Libona ang pagbaligya og barato nga bugas diin 2,500 ka sako ang gigahin alang sa mga benepisyaryo, matag sako adunay 10 ka kilo.
Sa pamahayag ni Engr. James Berlin Escaner, ang kasamtangang OIC sa Municipal Agriculture Office nga ang matag pamilya gitugotan nga mopalit og hangtod sa 10 ka kilo matag higayon ug kinatibuk-ang 30 ka kilo matag bulan. Ang presyo sa 10 ka kilo nga bugas mokabat sa Php200 lamang, mas ubos kumpara sa presyo sa merkado nga mokabat og Php50 hangtod Php60 matag kilo.
Ang maong programa gitagana alang sa mga Persons with Disabilities (PWD), senior citizens, solo parents, mag-uuma, ug mga drivers.
Alang sa pagpalit, kinahanglan magdala og identification card (ID) ang benepisyaryo ug kini pagahimuan og hulagway alang sa dokumentasyon. Sa mga dili makatambong, mahimo silang magpadala og representante basta adunay authorization letter ug kopya sa ID. Samtang ang ginikanan sa mga PWD nga bata mahimong mopalit alang kanila bisan walay authorization letter.
Gilauman nga mahurot o ma-liquidate ang kasamtangang suplay hangtod sa Mayo 4 o 5. Aduna usab plano nga palapdan ang programa ngadto sa ubang lugar sama sa Silipon area ug GK area sulod sa bulan sa Mayo.
Ang maong inisyatibo nahimong posible pinaagi sa panagtinabangay sa National Food Authority (NFA), Department of Trade and Industry (DTI), Provincial Government sa Bukidnon, ug Lokal nga Kagamhanan sa Libona.
Photo Courtesy: LGU Libona
