Nasakmit sa Capoocan Municipal Police Station ang mga gibiyaang kahoy atol sa ilang gihimong anti-illegal logging operation sa Brgy. Manloy, Capoocan, Leyte pasado alas 10 ang takna sa buntag kagahapong adlawa.
Sumala sa pulisya, nadiskobrehan ang upat ka pesa sa ilegal nga giputol nga mahogany human mikalagiw ang mga wala pa mailhing suspek sa dihang nabantayan nila ang presensya sa mga otoridad. Gibanabana nga moabot sa 63 ka board feet ang kinatibuk-ang gidaghanon sa kahoy nga adunay balor nga mokabat og mga ₱6,300.
Gidala dayon sa estasyon sa pulisya ang mga nasakmit nga kahoy alang sa dokumentasyon ug ipailalom sa hustong disposisyon sa dili pa kini itunol sa angay nga ahensya.
Sumala kang PCPT Joselito C. Mislos, pagapahugtan pa ang kampanya batok sa illegal logging aron mapanalipdan ang kalikupan ug panginabuhian sa komunidad.
