Giila karon ang Barangay Fabio, Tagana-an, Surigao del Norte, isip usa sa talagsaong destinasyon sa nasod diin makita ang Golden-crowned Flying Fox, nga giila nga pinakadakong kabug/paniki sa kalibutan ug usa ka bahandi sa Pilipinas.
Sa maong barangay, liboan ka mga kabug ang magtapok ug mopuyo sa mga tag-as nga kahoy. Sa pagsalop sa adlaw, makita ang talagsaong talan-awon sa ilang pagpanlupad aron mangita og pagkaon sama sa mga prutas sa lasang.
Gikonsiderar usab ang lugar isip posibleng “critical habitat,” nga nagpasabot sa kahinungdanon niini sa pagpanalipod sa maong endangered espisye. Sumala sa mga otoridad, ang presensya sa mga kabug nagpasabot nga himsog ug buhi ang ecosystem sa lasang.
Giawhag ang mga turista nga mobisita ilabina sa hapon aron masaksihan ang ilang paglupad, apan kinahanglan magpabiling hilom, magdala og binoculars, ug likayan ang pagdisturbo sa ilang puy-anan. Aduna usab mga lokal nga giya nga andam motabang aron masiguro ang luwas ug responsableng pagtan-aw.
Ang inisyatibo gilauman nga makahatag og dugang suporta sa conservation efforts samtang ginapakita ang natural nga katahum sa Tagana-an.
Photo Courtesy: Municipality of Tagana-an
