Nadakpan sa Tandag City Police Station ang usa ka suspetsado atol sa gilusad nga buy-bust operation kaganiha, Abril 30, 2026 didto sa Barangay San Agustin Sur, Tandag City.
Ubos sa pagpanguna ni PLTCOL Armando A. Martizano, Chief of Police sa Tandag PNP, gipahigayon ang operasyon batok sa ilegal nga droga nga miresulta sa pagkadakop sa usa ka lalaki nga nailhang si alyas “Pong-Pong,” 37-anyos, walay trabaho, ug residente sa Purok Pag-ibig, Barangay Quezon, Tandag City.
Sa operasyon, narekober gikan sa suspetsado ang siyam ka sachet sa gidudahang shabu lakip ang buy-bust item nga adunay kinatibuk-ang gibana-bana nga gibug-aton nga lima ka gramo ug adunay gibanabang Dangerous Drugs Value (DDV) nga mokabat sa ₱34,000.00.
Nasakmit usab gikan kaniya ang kantidad nga ₱11,150.00 nga cash, lakip ang ₱1,000.00 nga marked money nga gigamit sa operasyon.
Matod sa kapulisan, ang nadakpan nga indibidwal giklasipikar isip usa ka bag-ong giilang High-Value Individual (HVI).
Sa pagkakaron, giandam na ang kasong paglapas sa Republic Act No. 9165 o ang Comprehensive Dangerous Drugs Act of 2002 nga ipasaka sa City Prosecutor’s Office sa Tandag City.
Photo courtesy: Tandag City PNP
