Patay ang usa ka drayber sa sidecar human kini mabanggaan sa pribadong sakyanan sa National Highway sa Purok 2A, Barangay Ampayon, Butuan City, alas 9:50 sa buntag, sa milabayng adlaw. Ang namatay nga drayber naila nga si Lorry Nazarita Casumpang, 62-anyos, residente sa Purok 2B sa maong barangay.
Naangol usab sila Rowena Talisic Lumontad, 45-anyos, usa ka public school teacher, ug si Dimple Joy Padenas, 18-anyos, estudyante sa kolehiyo, nga parehong residente sa nasangpit nga lugar.
Nalambigit sa disgrasya usa ka Mitsubishi Mirage nga nagdala sa plaka numero CBC-1890, nga gimaneho ni Jess Lester Dulayba Hinayon, 30-anyos, usa ka private employee ug residente sa Tubay, Agusan del Norte.
Kahibaloan nga gikan sa Tubay ang pribadong sakyanan ug padulong unta sa Butuan City dihang nahidangat sa lugar nahitaboan nabangga kini nga miresulta sa kamatayon sa drayber sa sidecar.
Gikustodiya na karon sa Ampayon Police Station ang driver sa pribadong sakyanan samtang gitakdang posibleng pagpasaka og kaso gikan sa pamilya sa mga biktima.
