Gisulod sa wala pa mailhing mga kawatan ang Dunkin Donuts branch sa Andres Soriano Avenue, Barangay Mangagoy, Bislig City, sayo sa buntag ning adlawa, Abril 29, 2026.
Nasayran nga nadawat sa kapulisan ang tawag sa ilang hotline alas 7:02 sa buntag mahitungod sa nahitabong pagpanglungkab sa maong establisyemento, hinungdan sa dinaliang pagresponde sa mga otoridad aron susihon ang maong dapit.
Giasoy sa service crew sa maong establishemento nga sa iyang pag-abot sa tindahan mga alas 5:57 sa buntag, iyang namatikdan nga guba na ang doorknob sa luyo nga pultahan sa tindahan. Tungod niini, daling gipahibalo sa crew ang iyang mga kauban ug mitawag sa 911 hotline aron mangayo og tabang.
Nadiskobrehan sa mga trabahante sa pagsulod nila sa tindahan nga nahanaw na ang duha ka cash drawer box nga adunay sulod nga tag ₱2,000 matag usa, o kinatibuk-ang ₱4,000. Nawala usab ang usa ka cash vault nga adunay sulod nga ₱12,100 lakip na ang usa ka Tecno Android cellphone nga mobalor og ₱7,000.
Mokabat ngadto sa ₱23,100 ang kinatibuk-ang kantidad sa salapi ug kabtangan nga nakuha sa wala pa mailhing mga suspetsado.
Sa pagkakaron, gipahigayon na sa Bislig City Police Station ang follow-up investigation aron mailhan ang mga responsable sa likod niini nga krimen ug mapasaka ang angay nga kaso batok kanila.
Photo courtesy: Richard Grande
