Giduso sa mga kongresista sa Makabayan Bloc ang pagpataas sa basic salary sa mga magtutudlo sa pribadong eskwelahan ug sa State Universities and Colleges (SUCs) ngadto sa ₱50,000, gikan sa kasamtangang ₱33,947.
Gipangunahan ni House Deputy Minority leader ug ACT Teachers Party-list Rep. Antonio Tinio ang pagduso sa House Bills 8968 ug 8969 nga nagtumong sa maong pagtaas sa suweldo sa mga magtutudlo.
Sumala ni Tinio, ang tumong sa maong sugyot mao ang paghatag sa mga magtutudlo og desente ug may dignidad nga panginabuhi, isip pag-ila sa ilang dakong kontribusyon sa sektor sa edukasyon sa nasud.
Dugang pa niya, ang maong lakang subay usab sa giingon sa Konstitusyon nga kinahanglan iprayoridad ang edukasyon aron mapalambo ang katungod sa katawhan sa dekalidad nga pagkat-on. Giingon niya nga kauban niini ang obligasyon sa gobyerno sa pagpanalipod ug pag-atiman sa kaayohan sa mga magtutudlo.
Photo courtesy:Warner pacific university
