Nakadawat og ₱450,000 nga kantidad sa livelihood assistance ang 30 ka kababayen-an nga benepisyaryo sa Pantawid Pamilyang Pilipino Program (4Ps) gikan sa Sitio Ayoke, Barangay General Island, lungsod sa Cantilan, Surigao del Sur, pinaagi sa Department of Social Welfare and Development (DSWD) Caraga.
Ang maong tabang nagtimaan sa pagsugod sa usa ka community-based enterprise sa isla, nga nagtumong sa pagpalig-on sa panginabuhian sa mga pamilya sa mangingisda ug sa paghatag og dugang nga oportunidad sa kita sa komunidad.
Ang mga benepisyaryo, nga sakop sa Ayoke Karajaw Sustainable Livelihood Association, gihatagan og seafood processing equipment, usa ka processing facility, ug usa ka pump boat aron suportahan ang ilang planong seafood processing business ug mapadali ang pagdala sa ilang mga produkto ngadto sa duol nga merkado.
Sumala sa DSWD Caraga, ang maong ayuda gitumong aron matabangan ang mga pamilya sa mga mangingisda sa pag-diversify sa ilang tinubdan sa kita, ilabina sa mga hagit sama sa limitadong access sa merkado ug ubos nga kita gikan sa diretso nga pagbaligya sa preskong kuha sa dagat.
Pinaagi sa bag-ong livelihood support, gilauman nga mas mapalig-on sa mga kababayen-an ang ilang household income ug makatampo sa malungtarong pag-uswag sa ekonomiya sa ilang komunidad.
Gipasiugda usab sa ahensya nga ang maong programa kabahin sa padayon nga paningkamot sa gobyerno sa paghatag og mas lig-on nga panginabuhian ug mas maayong kaugmaon alang sa mga pamilyang kabus sa mga isla ug kabaryohan.
Photo courtesy: DSWD13
