Pormal nang gipalig-on sa Lokal nga Panggamhanan sa Hinatuan ang pakigtambayayong niini sa Department of Migrant Workers Caraga pinaagi sa pagpirma sa Memorandum of Agreement (MOA) niadtong Abril 27, 2026, aron mas mapalapad ang serbisyo ug suporta alang sa mga Overseas Filipino Workers (OFWs) ug ilang mga pamilya.
Ang maong kasabutan gipangulohan ni Tito Amistad Cañedo III, Municipal Mayor sa Hinatuan, uban ni Ritchel M. Butao, Regional Director sa DMW Caraga.
Gipasiugdahan usab kini sa Public Employment Service Office – LGU Hinatuan isip kabahin sa padayon nga paningkamot sa lokal nga gobyerno sa pagduol sa mga serbisyo sa gobyerno ngadto sa komunidad, ilabina alang sa mga OFWs nga nagtrabaho sa gawas sa nasud ug sa ilang mga pamilya nga nagpabilin sa lungsod.
Tumong sa maong partnership ang pagpalig-on sa implementasyon sa mga programa ug serbisyo sama sa welfare assistance, reintegration programs, ug employment facilitation aron masiguro nga adunay igo ug hapsay nga suporta alang sa mga migranteng mamumuo sa matag yugto sa ilang pagpanginabuhi.
Sumala sa LGU Hinatuan, dako ang papel sa maong kolaborasyon sa paghatag og mas sayon nga access sa tabang gikan sa gobyerno, labi na sa mga OFWs nga nagkinahanglan og suporta sa panahon sa ilang pagpauli, pagpangita og trabaho, ug pagbalik sa normal nga panginabuhi uban sa ilang pamilya.
Photo courtesy: Local Government Unit of Hinatuan
