Nadakpan sa gihimong buy-bust operation sa Bislig City Police Station ang usa ka 29-anyos nga lalaki nga gidudahang High Value Individual (HVI) drug personality sa New Road Purok 7, Piape, Barangay Poblacion, Bislig City, niadtong Abril 27, 2026 sa gabii.
Gipangulohan ang operasyon ni PLTCOL Jassen N. Tuario, Officer-in-Charge sa Bislig CPS, sa koordinasyon sa SDSPPO PIU, PDEU, ug sa Philippine Drug Enforcement Agency. Ang suspek giila sa alyas “Jun,” nga giingong bag-ong target sa anti-illegal drug campaign sa syudad.
Atol sa operasyon, nasakmit gikan sa suspek ang walo ka sachet sa gidudahang shabu nga gibanabana nga mokabat sa 1.8 gramos ug adunay kantidad nga kapin ₱12,000. Nakumpiska usab ang ₱500 nga marked money nga gigamit sa transaksyon sa buy-bust.
Sumala sa kapulisan, ang suspek ug ang nakumpiskang ebidensya anaa na karon sa husto nga kustodiya samtang giandam na ang pagsaka sa kaso batok kaniya.
Photo Courtesy: Bislig CPS
