Gipahibalo sa Department of Agriculture (DA) nga ang mga produktong pang-agrikultura nga pang-eksport maoy mahimong sentro sa unang Philippines Hand-in-Hand (HIH) National Investment Forum nga giablihan sa Ortigas, Pasig City uban ang mga international partners.
Tumong niini nga mapalig-on ang posisyon sa Pilipinas isip usa sa mga nanguna nga agribusiness hubs sa Asya pinaagi sa pagpalambo sa research, polisiya, ug modernisasyon sa sektor sa agrikultura.
Sumala kang DA Assistant Secretary Arnel de Mesa, dako ang potensyal sa nasud sa lain-laing produkto sama sa lubi, mangga, kape, kakaw, seaweeds, ug nangka.
Gihatagan usab og importansya ang kawayan, ug industriya sa kape ilabi na sa Bangsamoro Autonomous Region in Muslim Mindanao (BARMM).
Ang upat ka adlaw nga forum nagpunting sa inklusibong kalamboan pinaagi sa pagpakita sa kapasidad sa matag probinsya ug pagdani og mga pamuhunan nga moabot og labing menos Php1 bilyon.
Gilauman sa kalihokan nga makatabang kini sa pagpakunhod sa kagutom ug kakabos pinaagi sa modernong agrikultura nga suportado sa datos ug global nga kooperasyon.
Apil sa mga kauban sa forum ang Asian Development Bank (ADB), Food and Agriculture Organization (FAO), ug uban pang international partners nga nagpalig-on sa ilang suporta sa pagpataas sa pamuhunan ug modernisasyon sa agrikultura sa Pilipinas.
Photo Courtesy: PNA
