Samdan sa iyang tuong tiil ang usa ka 39-anyos nga lalaki human kini napugos nga pusilon sa mga personahe sa Police Station 1 General Santos Police Office niadtong domingo, Abril 26, sa Toledo Subdivision, Brgy. City heights, General Santos City.
Giila ang suspek nga si alyas Roldan, ulitawo ug residente sa Purok Dapila, Brgy. Dumail, Maasim, Sarangani Province, kinsa natugyan na karon sa kustudiya sa kapulisan sa Police Station 4 sa GSCPO human napatambalan sa ospital.
Nahitabo ang insidente pasado alas-12:30 sa udto samtang nagpahigayon og mobile patrol ang mga otoridad sa National Highway sa nasampit nga lugar. Nakadawat og report ang mga pulis mahitungod sa usa ka lalaki nga naghuramentado bitbit ang usa ka sundang.
Pag-abot sa mga personahe sa Police Station 1 GSCPO sa dapit, usa ka concerned citizen ang miduol kanila aron itudlo ang suspek nga sumala pa nangilog usab og cellphone.
Imbes nga mokooperar sa dihang giduol sa mga otoridad, kalit nga giisa sa suspek ang iyang sundang ug gisulayan pag-atake ang mga pulis.
Nakalikay ang usa ka opisyal sa maong pagpanigbas, hinungdan nga napugos ang kapulisan sa pagpabuto og pusil tumong sa tiil sa suspek aron kini mapahunong.
Samtatang giandam na karon sa kapulisan ang mga kasong paglapas sa Batas Pambansa Bilang 6, Theft, ug Direct Assault ubos sa article 151 sa Revised Penal Code batok sa nahisgutang suspetsado.
