Nagkauyon ang United Kingdom ug France nga mogahin og mokabat sa $892 million sulod sa tulo ka tuig aron sumpoon ang nagkadaghang illegal migrant crossings sa English Channel.
Ang maong pondo gamiton sa pagpalig-on sa seguridad sa baybayon sa northern France diin liboan ka mga migrante ang misulay sa pagtabok padulong UK.
Gibutyag sa report nga mokabat sa 41,000 ka mga tawo ang narekord nga mitabok sa Channel niadtong 2025, butang nga nakapaaghat sa duha ka nasud sa pag-deploy og hapit 1,100 ka mga pulis, intelligence operatives, ug military personnel sa mga coastal areas.
Ubos sa bag-ong kasabutan, gamitan usab ang operasyon og mga drones, duha ka helicopter, upgraded camera systems, ug dugang mga patrol vessels alang sa mas hugot nga pagbantay sa kadagatan.
Nagpahimangno ang kagamhanan sa UK nga ang maong pondo i-release lamang kon mapamatud-an nga epektibo ang maong mga lakang sa pagpakunhod sa mga migrante.
Sukad sa paglingkod ni Prime Minister Keir Starmer niadtong Hulyo 2024, ang hiniusang operasyon sa duha ka nasud nakapugong na sa kapin 42,000 ka mga iligal nga migrante nga mosulay unta sa pagtabok sa maong utlanan.
