Naila na sa militar ang 13 sa 19 ka mga personalidad nga nakabsan sa kinabuhi atol sa duguong enkwentro tali sa tropa sa gobyerno ug sa grupo sa New People’s Army (NPA) didto sa Toboso, Negros Occidental. Lakip sa mga napatay mao ang mga opisyal sa armadong grupo nga sila si Roger Fabillar Tapang (alias “Jhong”), Pedro Bonghanoy, Rene Villarin Sr. (alias “Kumader Pikot”), ug Glenmar Bacusmo (alias “Lloyde”).
Naapil usab sa listahan ang mga biktima nga giingong mga student leaders ug magtutudlo nga sila si Alyssa Alano sa UP Diliman, Maureen Keil Santuyo sa UP Manila, ug Maria Clarita Blanco gikan sa Cebu.
Gipakaylap sa Philippine Army pinaagi ni Spokesperson Col. Louie G. Dema-ala ang ilang opisyal nga tubag batok sa mga alagasyn sa human rights violation nga nanggula sa social media.
Hugot nga gihangyo sa militar ang publiko nga susihon og maayo kon ngano nga ang maong mga indibidwal, lakip na ang mga lider-estudyante, anaa mismo sa encounter site, armado, ug nakigpinusilay sa mga sundalo. Matud sa militar, ang presensya sa armas ug ang aktwal nga pag-apil sa engkwentro maoy naghatag og dakong pagduhaduha sa narrative nga sila mga inosenteng sibilyan lamang.
Nagpadayon pa ang mga otoridad sa pag-ila sa laing unom (6) ka mga patay’ng lawas nga nakuha gikan sa dapit nga nahitaboan. Gipasalig sa Philippine Army nga ang ilang mga tropa ningsunod sa International Humanitarian Law ug nagpabiling propesyonal sa tibuok operasyon.
Photo Courtesy:Manila standard
