Gipasidaan sa state-run think tank nga Philippine Institute for Development Studies (PIDS) nga posibleng moabot sa 1.34 milyong Pilipino ang mahulog sa kahimtang sa kakabos tungod sa pagsaka sa global oil prices nga gipalala sa tensyon sa Middle East.
Base sa ilang simulation, nagbase ang pagtuon sa krudo nga presyong $105 kada bariles ug 35% nga epekto sa lokal nga presyo sa gasolina. Tungod niini, gilauman nga mosaka ang poverty rate sa nasod gikan 13.2% sa 2025 ngadto 14.4%, nga makabalik sa pipila ka nakuha nang kalamboan.
Matod sa PIDS, mga 30% sa mga kabalayan sa Pilipinas vulnerable o delikado mahulog sa kakabos, apil na ang ubang bahin sa middle class. Ang labing apektado mao ang “near poor” nga duol ra sa poverty line ug dali maigo sa pagsaka sa presyo sa palaliton.
Gipakita usab sa pagtuon nga samtang mas dako og kwarta nga mawala sa mas adunahang pamilya, mas bug-at ang epekto sa pobre kay kadaghanan sa ilang kita mapaingon ra sa panginahanglanon sama sa pagkaon ug pamasahe, ug halos walay savings.
Girekomenda sa PIDS ang mas target nga social protection programs aron matabangan ang mga pobre ug near-poor nga pamilya, lakip ang mga minimum wage earners, persons with disabilities, ug ubang vulnerable households nga wala pa sa existing assistance programs.
