Nagpahimangno pag-usab ang LGU Cordova ubos sa liderato ni Cordova Mayor Cesar “Didoy” Suan sa tanang Cordovanhon bahin sa estriktong pagpatuman sa “No Segregation, No Collection Policy” sa tibuok lungsod.
Tumong niini ang pagpalig-on sa disiplina sa pagdumala sa basura ug pagpanalipod sa kinaiyahan pinaagi sa hustong pagbulag sa mga basura.
Sumala sa palisiya, dili kolektahon sa mga barangay personnel ang basura kung kini wala ma-segregate sa malata, dili malata, ug recyclable nga mga materyales.
Gipasabot sa LGU nga responsibilidad kini sa matag panimalay, negosyo, ug bisan sa mga bisita nga anaa sa lungsod ang pagsunod sa maong lagda.
Ang maong polisiya gibase sa Ordinance No. 2017-003 o ang “Environment Code of the Municipality of Cordova,” nga gipangamahan ni Hon. Lemuel Pogoy.
Gipahimangnoan usab ang publiko nga adunay katugbang nga silot ang paglapas niini nga balaod, lakip na ang multa nga magsugod sa Php200 hangtod sa Php2,000 ug posible nga pagkabilanggo depende sa kadaghan sa paglapas.
Sa mga establisyemento, mahimong bawi-on ang ilang sanitary clearance kung mapamatud-an ang paglapas. Tungod niini, giawhag ang tanan nga makigkoordinar sa ilang barangay officials aron mahibal-an ang hustong drop-off areas ug sistema sa paglabay sa basura
Photo credits: Municipality of Cordova-Official / Fb Page
