Mipirma og kasabutan ang Department of Education (DepEd) ug Department of Public Works and Highways (DPWH) aron mapaspasan ang pagtukod ug pag-ayo sa mga pasilidad sa eskwelahan, isip tubag sa dugay nang kakulang sa mga classroom sa nasud.
Gipangulohan nila Education Secretary Sonny Angara ug Public Works Secretary Vince Dizon ang pagpirma sa memorandum of agreement nga magpatuman og usa ka hiniusang sistema sa pagplano, disenyo, ug pagtukod sa mga pasilidad pang-edukasyon sa tibuok nasud.
Sumala kang Angara, tumong sa kasabutan nga mapadali ang pagtukod sa dekalidad ug luwas nga mga classroom, subay sa direktiba ni President Ferdinand Marcos Jr. nga palig-onon ang sektor sa edukasyon.
Gipasalig usab ni Dizon nga paspason ang implementasyon sa mga proyekto aron dali matubag ang panginahanglan sa mga eskwelahan.
Sakop sa programa ang pagtukod, pag-ayo, ug rehabilitasyon sa mga building gikan kindergarten hangtod senior high school, apil na ang mga pasilidad alang sa technical-vocational training ug Last Mile Schools.
Gibutyag ni Angara nga posibleng moabot og pila ka tuig ang hingpit nga pagsulbad sa kakulang, ug gikinahanglan ang padayon nga suporta sa umaabot nga mga administrasyon.
Photo Courtesy: Go for Lokal
