Gilungkab sa usa ka suspek ang upat ka establisyemento sa Barangay Bagontapay, M’lang, Cotabato, niadtong nakalabay nga adlaw.
Sa pakighinabi sa Juander Radyo News Team kang Kagawad Patrick Malicse ang on-duty niadtong panahona, nadakpan nila ang suspek nga 22-anyos ug residente sa Barangay Bual, Tulunan, Cotabato, ug aduna usab kini gipuy-an sa Barangay Bagontapay.
Dugang pa, bandang alas 2 sa kadlawon dihang adunay nitaho sa BPAT outpost nga adunay gilungkab nga bakery sa Purok Mabinuligon sa naasoy nga barangay, hinungdan nga dali kining giaksyonan sa mga sakop sa BPAT kauban ang mga personahe sa M’lang Municipal Police Station.
Tungod niini, nagpahigayon og roving ang kapulisan ug BPAT ug ilang namatikdan ang usa ka lalaki sa Purok Katilingban sa naasoy nga barangay, nga adunay dalang cellophane nga puno sa coins ug papel nga kwarta, hinungdan nga nagduda na ang mga otoridad ug gidala kini sa BPAT Outpost.
Nasuta nga upat ka establisyemento nga gilangkuban sa Botika, Tindahan, Bakery ug Bularan ang nitaho ug positibong giila ang suspek nga maoy nisulod ug nilungkab base sa kuha sa ilang CCTV.
Sa karon, anaa na sa kustodiya sa M’lang PNP ang suspek alang sa tukmang disposisyon.
Photo Courtesy:wikipedia
