Nag-viral sa social media ang usa ka humanoid robot human kini makita nga nagukod sa tulo ka baboy-ihalas sa Warsaw, Poland.
Sa video nga mikatag online, makita ang robot nga ginganlag Edward nga nag abog sa mga baboy-ihalas gikan sa pampublikong lugar paingon sa kalasangan.
Sumala sa caption sa post, tumong sa robot ang pagtabang sa pagpauli sa mga hayop ngadto sa ilang natural nga puy-anan aron malikayan ang peligro sa mga residente.
Sulod sa 33 segundos nga video, klarong nakita ang pagdagan sa robot samtang gi-gukod ang mga baboy-ihalas nga nakakuha dayon sa atensyon sa milyon-milyong netizens sa tibuok kalibutan.
Nagkadaiya ang reaksyon sa mga tawo online, ang uban nahibulong ug nalipay, samtang ang uban nagpahayag og kabalaka sa posibleng epekto sa teknolohiya sa umaabot.
Sa pagkakaron, ang maong video nakaabot na og milyon nga views ug libo-libong reaksyon, nga nagpakita sa kusog nga interes sa publiko sa padayon nga pag-uswag sa robotics ug artificial intelligence.
