Patay ang usa ka 42-anyos nga lalaki human gipusil sa wala mailhing mga suspek sa Barangay Tiburcia, Kapalong niadtong nakalalabay nga adlaw. Giila ang biktima sa alyas nga “Jes” minyo ug nagpuyo sa Purok 2, Dulapo, Oroquieta City, Misamis Occidental.
Sumala sa imbestigasyon, nagsakay ang biktima sa iyang motorsiklo nga Honda XRM 125 ug paingon sa Barangay Maniki pinaagi sa Kapalong–Valencia City Road. Pag-abot sa dapit sa Eternal Homes Memorial Garden, kalit siyang gipusil sa mga wala mailhing tawo.
Tungod sa pagpamusil, nawad-an og kontrol ang biktima sa iyang motorsiklo ug miliko gawas sa dalan, mibangga sa mga kahoy-kahoyan ug nahulog sa sapa. Samtang nakaangkon siya og daghang samad pinusilan sa nagkalain-laing parte sa lawas nga hinungdan sa iyang hinanaling kamatayon. Gidala pa ang biktima sa Kapalong District Hospital apan gideklarar nga dead on arrival.
Sa crime scene, narekober ang usa ka basiyo sa bala nga gituohang gikan sa .45 caliber pistol, motorsiklo sa biktima, ug kantidad nga PHP 1,591.00 nga kwarta.
Sa pagkakaron, padayon ang hot pursuit operation sa kapulisan aron mailhan ug madakpan ang mga suspek sa pagpamusil.
Photo Courtesy : KMPS
