Kanselado ang gikatakdang ika-30 na katuigan sa Kaliguan Festival 2026 sa Lungsod sa Cagwait lalawigan sa Surigao del Sur, kini subay sa executive order number 35 series of 2026.
Kini nga desisyon gihimo human sa pagtimbang-timbang ug nahiuyon sa mga nasudnong direktiba nga nagpasiugda sa mga lakang sa pagdaginot sa enerhiya ug ang pag-una sa mga importanteng serbisyo sa gobyerno. Tungod sa gideklarar nga National Energy Emergency ug giya gikan sa Department of the Interior and Local Government (DILG), giila sa Munisipyo ang panginahanglan sa responsableng pagdumala sa kuryente, gasolina, ug panginabuhian.
Angayang masayran nga ang mga dagkong kalihokan sama sa mga Fiesta nanginahanglan ug dakong gasto hinungdan nga lisod kini i-selebrar karung panahona. Tungod niini, ang tanan nga may kalabutan sa mga kalihokan opisyal nga gikansela sa LGU-Cagwait.
Dugang pa, ang mga pondo nga orihinal nga gigahin alang unta sa pista i-reprogram na lamang aron suportahan ang mga prayoridad nga programa ug mga mahinungdanon nga serbisyo nga direktang makabenepisyo ang komunidad.
Alayon usab niini, gihangyo sa lokal na panggamhanan ang mga katawhan alang na sa dugang pagsabot niini.
Photo courtesy:Mindanews
