Nasikop sa mga personahe sa San Miguel Municipal Police Station ang No. 8 Most Wanted Person sa probinsya sa Surigao del Sur nga nag-atubang sa kasong murder atol sa operasyon nga gikasa niadtong Abril 16, 2026.
Sumala sa taho gikan sa Surigao del Sur Police Provincial Office, nahitabo ang pagkasikop sa buntag sa Purok 5, Barangay Sagbayan, San Miguel pinaagi sa mga operatiba sa San Miguel Municipal Police Station ubos sa pagpanguna ni PMAJ Joemel L. Maquiling, ang Acting Chief of Police sa maong estasyon.
Ang dinakpan giila sa alyas “Lotlot,” mag-uuma ug residente sa Purok 6, Barangay Bitaugan, San Miguel, Surigao del Sur kinsa gi-aresto pinaagi sa Warrant of Arrest alang sa kasong murder ubos sa Article 248 sa Revised Penal Code kondiin gipagawas sa Presiding Judge sa Regional Trial Court, Branch 41 sa Cantilan, Surigao del Sur niadtong Hulyo 30, 2024, ug walay gitakdang piyansa.
Atol sa pagka sikop, gipahibalo sa mga kapulisan ang suspek sa iyang mga katungod ug dayong gidala sa San Miguel Municipal Police Station alang sa hustong dokumentasyon ug pagproseso sa dili pa itugyan sa korte.
Photo Courtesy: Surigao Del Sur Police Provincial Office
