Patay nang napalgan sa National Irrigation Canal ang usa ka 70-anyos nga senior citizen, human kini gituhoang natagak sa Purok 6, Brgy. Tagbongabong, RTR Agusan del Norte, alas 6:30 sa buntag.
Giili ang biktima nga si Epitasio Lobrio Plaza Sr., 70-anyos nga lumolupyo sa nahisgutang lugar. Nakadawat og tawag ang RTR Municipal Police Station, gikan sa usa ka concern citizen kabahin sa usa ka tawo nga napalgang Patay sa Brgy. Tagbongabong, og dali usab kining gisuhid sa mga kapulisan.
Sa inisyal nga imbestigasyon ni PSMS Danilo Gaudia Jr, Duty Investigator, nasayran nga ang biktima gikan sa iyang mga paryenti nga katapusan nila kining nakita adtong April 15 sa udto nga dili maayo ang kondisyon sa lawas. Posible matod pang nahulog ang biktima sa irrigation canal ug nalumos nga nag miresulta sa iyang kamatayon.
Gitambagan sa kapulisan ang mga kabanay sa biktima nga ipailalom sa autopsy ang patay’ng lawas sa biktima aron masayran kung, aduna o wala bay foul play sa iyang kamatayon.
