Gipasalig sa Department of Social Welfare and Development (DSWD) nga magpadayon ang implementasyon sa Walang Gutom Program bisan pa sa padayon nga pag-usbaw sa presyo sa mga palaliton hilabi na sa pagkaon.
Sumala sa ahensya, magpadayon gihapon ang pagpanghatag og libreng pagkaon ngadto sa mga benepisyaryo bisan pa sa epekto sa nagpadayon nga armadong panagbangi sa middle east nga nakaapekto sa presyo sa merkado.
Gibutyag sa DSWD nga lig-on ang ilang commitment sa publiko, hilabi na sa mga vulnerable sector, aron masiguro nga adunay access sa masustansyang pagkaon bisan sa nagkalisod nga kahimtang sa nasud.
Matod pa ni DSWD Undersecretary Edu Punay, tungod sa pagsaka sa presyo sa mga palaliton, nagpadayon ang ilang ahensya sa pagpangita og praktikal ug alternatibong paagi sa pag-apod-apod sa pagkaon nga dili makompromiso ang nutrisyon sa mga benepisyaryo.
Ilawom sa programa, ang matag benepisyaryo makadawat og Php3,000 matag bulan nga food credits, lakip na ang giya sa hustong food budgeting ug pag-andam sa pagkaon.
Photo Courtesy: DSWD
