Gilunsad sa Department of Labor and Employment (DOLE) ang “TUPAD Tuloy Pasada” program aron madugangan ang income sa mga drayber sa jeep nga naapektuhan sa pagsaka sa presyo sa lana sa nasud.
Ubos sa programa, makadawat og ₱695 matag adlaw ang inisyal nga 134 ka drayber sa jeep nga nagabiyahe sa mga ruta sa Metro Manila. Katumbas ang maong kantidad sa minimum wage sa rehiyon ug dugang pa kini sa ilang regular nga income gikan sa pagbyahi.
Sumala sa DOLE, ang pagpili sa mga benepisyaryo pagabuhaton pinaagi sa profiling ug validation, diin ang unang listahan kuhaon gikan sa Land Transportation Franchising and Regulatory Board (LTFRB).
Mahimong mo-apply ang mga drayber nga wala pa maapil sa inisyal nga listahan sa pinakaduol nga opisina sa DOLE pinaagi sa pagpresentar og balido nga professional driver’s license.
Makadawat ang matag kwalipikadong drayber sa ayuda sulod sa hangtod 30 ka adlaw. Kabahin ang maong programa sa lakang sa DOLE aron mapagaan ang epekto sa pagsaka sa presyo sa lana sa sektor sa pampublikong transportasyon.
Target sa gobyerno nga matabangan ang kapin sa 50,000 ka drayber sa tibuok nasud, ug gilauman usab nga mapalapdan kini sa ubang sektor sama sa mga truck driver nga naghatod og produktong agricultural.
