Gumikan sa iyang pangandoy nga makapangita og trabaho aron masuportahan ang kaugalingon, usa ka lalaki sa Bashkortostan, Russia nga giila sa alyas nga Oleg, ang nakahimo og kontrobersyal nga desisyon human mapakyas sa pagpangita og trabaho.
Human makagradwar sa high school ug makaserbisyo sa military, misulay kini og pangapply og trabaho sa Ufa City apan wala gayud siyay nakitang oportunidad.
Tungod sa kalisod sa kahimtang, iyang gihunahuna nga mas praktikal ang pagpuyo sulod sa prisohan aron masiguro ang pagkaon ingon man katulgan ug aron matuman ang iyang plano matuman, nagbuhat kini og peke nga hulga sa bomba.
Una niya kini gisulayan sa usa ka hotel apan wala kini tagda. Gisundan niya kini sa Ufa airport diin nadakpan sa security personnel. Nasuta sa imbestigasyon nga walay tinuod nga bomba, ug iyang giangkon nga buot lamang niini mapriso.
Gipailawom kini sa psychiatric evaluation ug napamatud-an nga normal ang iyang kahimtang sa pangisip. Tungod niini, gisentensyahan siya og tulo ka tuig ug duha ka bulan sa penal colony.
Didto, makadawat siya og regular nga pagkaon ug lugar nga kapuy-an—mga butang nga wala niini matagamtam sa gawas tungod walay trabaho.
Padayon nga pahimangno sa mga otoridad nga dili angay gamiton ang ilegal nga paagi aron lamang makalikay sa kalisod sa kinabuhi.
Photo Courtesy: Listverse
