Gibutyag sa Department of Finance (DOF) nga mokabat sa ₱4.1 bilyon ang mawala nga kita sa gobyerno sulod sa tulo ka bulan tungod sa pagsuspinde sa excise tax sa kerosene ug liquified petroleum gas (LPG).
Matod ni Undersecretary Karlo Fermin Adriano, kini nga lakang gihimo isip tubag sa nagpadayong krisis sa Middle East nga nagpasaka sa presyo sa lana sa merkado sa kalibutan, diin gibase ang kwenta sa presyo nga $100 matag baril.
Gipasabot ni Adriano nga kon apilon ang pagsuspinde sa excise tax sa diesel ug gasolina, mosaka ang lugi sa gobyerno ngadto sa ₱43.6 bilyon. Bisan pa man kon duna’y madugang nga koleksyon sa Value-Added Tax (VAT) nga moabot sa ₱13 ngadto sa ₱14 bilyon tungod sa taas nga presyo sa lana, duna gihapoy mabilin nga dakong kabilinggan o net loss nga mokabat sa ₱30 bilyon sa pundo sa nasod.
Tungod niini, nakahukom ang administrasyon ni Presidente Ferdinand Marcos Jr. nga ipatuman lamang ang suspensyon sa LPG ug kerosene. Ang maong desisyon gipalig-on pinaagi sa Republic Act 12316, nga naghatag sa Presidente og “emergency power” sa pag-usab sa excise tax rate sa lana aron mahatagan og kahupayan ang publiko sa panahon sa krisis.
Photo Courtesy: PNA
