Nahimong instant celebrity ang usa ka manok sa Shanghai human gi-pedicure sa iyang amo—oo, sakto imong nadunggan… manok nga naka-nail polish.
Ang tag-iya nga si Yi Yi, nakahuna-huna nga kinahanglan na daw pagwapahan ang kuko sa iyang pet nga manok. Gisulayan pa gyud niya dad-on sa nail salon, pero gi-reject siya—kay basin daw maapektohan ang “image” sa salon. Abi siguro nila, mahimong “chicken salon” na.
Wala madala si Yi Yi, siya na mismo ang nag-pedicure sa iyang manok. Kapin usa ka oras ang iyang gigahin, ug gi-designan pa gyud niya og makulay nga nail polish, sequins, ug beads—murag mo-attend og fashion show ang manok.
Matod pa niya, regalo niya kini sa iyang alagang manok tungod kay kuyog niya kini sa lisod nga panahon sulod sa duha ka tuig. Mao nga gikan sa “farm life,” ni-level up na ngadto sa “glam life” ang manok!
Human niini, nag-viral ang mga hulagway ug video sa sosyalera nga manok sa social media. Apan adunay uban nga naglibog ug nangutana kung okay ra ba ang kahimtang sa manok.
Gipasabot ni Yi Yi nga wala gyud maapektohi ang paglakaw sa manok ug wala sab kini na-stress—murag nalipay pa gani…og sama sa naghulat kini og sunod nga spa appointment sa salon.
Sa karon, dili na lang ordinaryong manok—kundi certified “beauty queen” na sa internet! Ug kini nga balita siguradong makaingon ka: “Kani nga manok, mas gwapa pa nako!”
Photo courtesy: Oddity Central
