Gipadayag ni Cebu City Councilor Mikel Rama ang iyang paniguro sa desisyon sa walo ka konsehal nga mibotar batok sa scholarship accreditation, ug gilimod ang alegasyon nga kontra sila sa edukasyon. Matod niini, ang ilang boto dili pagsupak sa edukasyon kundili pagpanalipod sa interes sa mga scholars.
Gipasabot ni Rama nga padayon ang suporta sa Konseho sa edukasyon, ilabi na sa 24 ka mga eskwelahan nga adunay lig-on nga akreditasyon ug walay legal nga isyu. Ang mga aplikasyon nga wala maaprobahi, sumala niya, adunay kakulangan sama sa kulang nga academic records, dili kompleto nga papeles, ug mga problema sa campus accreditation.
Gipamahayag usab niya ang iyang kabalaka sa insidente diin ang mga estudyante gidala ngadto sa City Hall ubos sa rason nga scholarship orientation, apan nasangit sa sulod sa session hall.
Alang kaniya, dili kini angay ug naghatag og sayop nga hulagway sa kahimtang. Gihingusgan ni Rama nga dili angay gamiton ang mga estudyante aron mopugos sa desisyon sa Konseho.
Dugang pa niya, importante nga sundon ang balaod ug siguruhon nga ang tanang aplikasyon motuman sa hustong proseso ug sumbanan sa dili pa kini aprobahan.
Photo credits: Snip from Cebu City News Facebook live
