Naguol karon ang basketball community sa nasud human mitaliwan ang kanhing Philippine basketball standout ug two-time Olympian nga si Edgardo Roque niadtong Abril 12 sa edad nga 88-anyos.
Si Roque naila isip garbo kaniadto sa Jose Rizal University sa wala pa siya misaka sa commercial league nga MICAA, diin siya nagdula alang sa mga koponan sa Ysmael Steel, YCO Painters, ug Mariwasa.
Sa international nga game dako ang nahimong kontribusyon ni Roque isip sakop sa Philippine national basketball team, diin nagrepresenta siya sa nasud sa 1960 Rome Olympics ug nahimong alternate alang sa 1968 Mexico Olympics.
Usa usab siya sa mga nakatabang sa pagkab-ot sa Pilipinas sa bulawang medalya sa 1962 Asian Games ug nakigbahin sa nagkadaiyang FIBA Asia Championships niadtong katuigan sa 1960, lakip na ang 1963, 1965, ug 1967 editions.
Photo Courtesy: SEAG Network
