Gipahibalo sa Department of Energy (DOE) nga ang suplay sa lana sa nasod moabot pa og saysenta’y kwatro (64) ka adlaw human makakuha og mga bag-ong orders.
Sumala ni Energy Secretary Sharon Garin, gikan sa average nga 50.31 ka adlaw, nadugangan kini og katorse ka adlaw tungod sa mga bag-ong kumpirmadong delivery.
Base sa datos sa DOE, ang suplay sa matag produkto mao ang mosunod: ang gasolina moabot og 54 ka adlaw, ang diesel anaa sa 48 ang LPG sa 36 ang kerosene sa 104 ang jet fuel sa 67 samtang ang fuel oil moabot og 45 ka adlaw.
Hinuon, giklaro sa kalihim nga dili kayang magpundo ang nasod og suplay nga molungtad og 90 hangtod 120 ka adlaw tungod sa limitadong storage facilities ug ang padayon nga konsumo sa publiko.
Gidugang pa ni Garin nga ang kasigurohan sa delivery nagdepende usab sa nasod nga gigikanan ug sa matang sa kontrata niini. Taliwala sa nagpadayong tensyon didto sa middle east, gipasalig sa DOE nga nagpabiling igo ang suplay sa lana samtang padayon ang ilang paningkamot nga makakuha og dugang nga suplay alang sa nasod.
Photo Courtesy:MSN
