Samdan ang magtiayon human gisulayan og hold-up ug misukol sa mga suspek sa Purok 3, Barangay New Caridad, Tulunan, Cotabato, alas 6:40 sa gabii niadtong Abril 13, 2026.
Sumala pa ni PMAJ Rolando Dillera Jr., ang Chief of Police sa Tulunan Municipal Police Station, giila ang mga biktima nga sila si Lilibeth Demaulo, 44 anyos, ug iyang bana nga si Josue Demaulo, susamang residente sa maong lugar.
Samtang duha ka wala mailhing lalaki ang misulod sa ilang panimalay nga adunay tabon ang nawong.
Dugang pa, nagpakaaron-ingnon pa ang mga suspek nga nangutana kung adunay ilimnon nga mapalit, apan sa dihang mitubag ang biktima nga wala, kalit nga gitutokan og pusil si Lilibeth. Apan wala mibuto ang armas, hinungdan nga misukol ang biktima ug nakigbisog.
Miduol dayon ang iyang bana aron motabang, apan gilabay sila og bato sa mga suspek hinungdan nga nakaangkon sila og samad sa ulo.
Samtang niresponde usab dayon ang igsoon ni Lilibeth nga si Ramil Lariosa og iyang gitigbas ang isa sa suspek gamit ang lagaraw.
Human sa insidente, miikyas ang mga suspek ug nabilin sa lugar ang pipila ka ebidensya lakip ang t-shirt, cap, ug tsinelas.
Gidala dayon ang mga biktima sa ospital alang sa medikal nga atensyon, samtang nagpadayon ang imbestigasyon ug hot pursuit operation sa kapulisan aron madakpan ang mga suspek.
Photo Courtesy:Tulunan Municipal Police Station
