Viral og nahimong sentro sa diskusyon sa social media ang usa ka talagsaon ug karaan nga tradisyon sa dakbayan sa Trento, Italy, diin ang mga opisyal sa kagamhanan nga giisip nga nakahimo og sayop nga desisyon simbolikong “silotan” pinaagi sa paglubog sa suba.
Kini nga kalihokan bahin sa tinuig nga Feste Vigiliane, diin gipahigayon ang ritwal nga gitawag og La Tonca. Ubos niini nga tradisyon, usa ka “Court of Penance” (Korte sa Penansya) ang mopili og usa ka iladong personalidad—kasagaran usa ka politiko—nga giisip nga nakahimo sa pinaka-makauulaw o kontrobersyal nga desisyon sulod sa tuig.
Ang napili nga indibidwal ibutang sa sulod sa usa ka puthaw nga hawla ug ituslob sa bugnaw nga tubig sa Suba sa Adige sa makatulo ka higayon.
Bisan pa man, giklaro sa mga organizers nga ang “La Tonca” dili usa ka seryosong silot nga nagtinguha sa pagpasakit. Sa modernong panahon, gihimo na lamang kini isip usa ka porma sa satire o komedya aron sa paghatag og kalingawan sa publiko ug pagpahinumdom sa mga lider sa ilang obligasyon sa katawhan.
Ang maong tradisyon naggikan pa sa ika-14 hangtod sa ika-17 nga siglo. Kaniadto, gigamit kini nga tinuod nga silot alang sa mga tawo nga sad-an sa pagpasipala sa relihiyon. Tungod sa maong balita, daghang mga netizens sa Pilipinas ang nipaambit sa maong report.
Ubay-ubay ang nagkanayon nga epektibo unta kini nga paagi sa pagdisiplina ug pagpahinumdom sa mga lokal nga opisyal nga wala nagtuman sa ilang mga saad sa serbisyo publiko.
Sa pagkakaron, nagpabilin ang “La Tonca” nga usa sa mga pinaka-giatiman nga kultural nga kalihokan sa Italy nga nagpakita sa kusog sa tingog sa katawhan pinaagi sa mabulukon ug makalingaw nga paagi.
Ang istorya mga kajuander, nagpakita sa hustisya ug accountability sa mga lider. Bisan pa og simboliko o dili literal, nagpasabot kini sa pangandoy sa publiko nga mapanubag ang mga nagbuhat og sayop.
Ang liderato usa ka dakong responsibilidad, ug ang mga naa sa pwesto kinahanglan magpakita og integridad ug pagkamatinud-anon. Apan, nagpahinumdom usab kini nga ang hustisya kinahanglan ipatuman sa husto ug tawhanong pamaagi, dili pinaagi sa kapintas o dautang pamaagi. Ang tinuod nga kausaban makab-ot pinaagi sa balaod, disiplina, ug aktibong partisipasyon sa katawhan.
Photo Courtesy: Things You Don’t Know
