Nakadawat og lima ka crates sa itlog ang usa ka football player nga si Kennedy Musonda, didto sa Zambia isip iyang Man of the Match award nag viral sa online.
Matod nga si Musonda nagdula alang sa Power Dynamos FC sa usa ka duwa kontra sa Nkana FC sa Zambian Super League. Siya ang nakaiskor sa bugtong goal nga naghatag og 1-0 nga kadaugan sa iyang koponan.
Human sa duwa, gideklarar siya nga Man of the Match. Apan imbes tropeyo, cash prize, o champagne, lima ka crates sa itlog ang iyang nadawat. Sumala sa report, duha ka crates alang sa iyang game-winning goal ug tulo pa ka crates isip award sa iyang talagsaong performance sa duwa.
Ang maong eksena dali nga mikatag sa social media tungod kay lahi kini sa kasagarang awards nga makita sa football. Daghang netizens ang nalingaw ug nahingangha sa talagsaong premyo, samtang ang uban miingon nga praktikal usab kini tungod kay mapuslanon sa adlaw-adlaw nga panginahanglan.
Usa ka goal. Usa ka daog nga duwa. Ug lima ka crates sa itlog nga madala pauli pamatuod nga lain-laing klasi ang paghatag og award sa kalibutan sa sports.
Photo Courtesy: South Sudan
