Nahimong viral karon sa social media ang usa ka bata didto sa Leyte human mikatap ang video niini diin makita nga duna kini katakus nga makapasiga og bombilya pinaagi lamang sa pagdikit niini sa iyang ilong
Sumala sa iyang ninong nga si Zhyrus, nahitabo ang insidente samtang namalit sila og gamit sa balay, diin kalit nga misiga ang bombilya paghikap sa ilong sa bata nga giila sa alyas nga “Kaikai.” Gisulayan usab kini sa ubang miyembro sa pamilya apan pakyas sila sa pagpasiga niini, hinungdan nga gi-ingong adunay “boltahe” ang bata.
Bisan pa man og nalingaw ug natingala ang mga netizens sa giingong “superpower” ni Kaikai, nagpahayag naman og dakong kabalaka ang inahan sa bata tungod sa kahadlok nga basin aduna kini dautang epekto sa kahimsog ug panglawas sa iyang anak.
Sa kasamtangan, wala pay opisyal nga pahayag gikan sa mga eksperto o independente nga pagsusi nga nagkumpirma nga adunay espesyal nga abilidad ang bata.
Gidudahan sa kadaghanan nga posible nga adunay siyentipikong rason o kahimtang sa maong bombilya (sama sa mga trick o rechargeable emergency bulbs nga mosiga basta madikit sa umog o panit), apan nagpadayon gihapon kini sa pagdani og nagkalayong diskusyon ug reaksyon sa internet
Photo Courtesy: km_jessica_soho IG
