Giklaro ni Konsehal Jason Chad Ayala ang kasamtangang dagan sa kasabutan ug ang mga legal nga lakang nga ipahigayon batok sa duha ka suspek nga nalambigit sa nahitabong pagpangulata sa usa ka convenience store sa Barangay San Jose, Malaybalay City nilabayng semana.
Sumala sa taho, nagsugod ang kagubot tungod sa kahubog sa duha ka grupo nga nag-inom sa managlahing lamesa, nga miresulta sa usa ka bayolenteng panaglalis. Sa usa ka video nga nakuha gikan sa maong insidente, nakita ang grabe nga pagpangulata diin ang biktima gipuspusan pa og bangko.
Sa esklusibong pakighinabi sa Juander Radyo Malaybalay, gipasabot ni Konsehal Ayala nga pinaagi sa pakig-alayon sa mga opisyal sa Barangay Patpat, daling nailhan ang duha ka suspek sulod lamang sa duha ka adlaw human sa hitabo. Ang pamilya sa mga suspetsado nipadayag na usab sa ilang kaandam nga mosurender ug moatubang sa ilang tulubagon sa balaod.
Sa panagtagbo sa opisina ni Konsehal Ayala uban ang usa ka abogado, gituki ang kasabutan diin ang pamilya sa mga suspek miuyon nga motabang sa tanang gasto sa medikal ug CT scan sa biktima nga taga-San Fernando
Dungan niini, nanawagan ang konsehal—ubos sa suporta ni Mayor Jay Warren Pabillaran—sa pagmintinar sa kalinaw sa Malaybalay aron maprotektahan ang imahe sa syudad alang sa mga lumulupyo ug mga bisita.
Nagpasalamat usab ang opisyal sa dinaliang aksyon sa Malaybalay City Police Station ubos sa pagdumala ni Police Lt. Col. Jupet Paglinawan.
Kini nga lakang nagpakita sa lig-on nga baroganan sa lokal nga kagamhanan nga dili motugot sa bisan unsa nga matang sa kagubot nga makabalda sa seguridad ug kahapsay sa katawhan
Photo Courtesy: Jason Chad Ayala
