Nasakmit sa kapulisan ang mokabat sa ₱442,000 sa ilegal nga droga mga alas 6:05 sa gabii niadtong Abril 11, 2026 sa Purok 2, Barangay Capinonan, Cabanglasan, Bukidnon.
Giila ang suspetsado nga si alyas “Tin2x,” 44-anyos, lalaki kinsa giingong dugay nang gimonitor sa kapolisan nga usa sa mga nag-unang supplier og droga sa maong lungsod.
Gipangunahan ang operasyon ni PCPT Linomer L. Caseres, OIC, uban sa 1st Bukidnon Provincial Mobile Force Company ug sa koordinasyon sa Provincial Intelligence Unit sa Bukidnon Police Provincial Office.
Samtang nakumpisa ang 65 gramos sa gituohang shabu, 1 ka gramo nga marijuana, timbangan, gunting, lighter, mga improvised aluminum foil tooter ug uba pang drug paraphernalias kung asa gi-turnover sa Provincial Forensic Unit alang sa eksaminasyon.
Tingkagol karon sa Cabanglasan Municipal Police Station ang nasangpit nga dinakpan samtang giandam na ang kasong paglapas sa RA 9165 o Comprehensive Dangerous Drugs Act.
Gikabutyag nga adunay lain pang mga target nga padayon gimonitor karon sa Cabanglasan sa pagkalambigit sa susamang ilegal nga kalihukan.
Photo Courtesy: Cabanglasan Municipal Police Station
