Giklaro sa Department of the Interior and Local Government (DILG) nga dili na tugotan ang lokal nga kagamhanan nga mohimo og regular ug special sessions gawas sa ilang hurisdiksyon.
Matod sa DILG, ang paghimo sa mga session sa ubang lugar nakapaminus sa access sa publiko sa mga deliberasyon og desisyon nga direkta nga nakaapekto ngadto nila.
Mahimo sab nga makwestyon sa insaktong hukmanan ang mga session nga gihimo gawas sa hurisdiksyon sa usa ka LGU ug posibleng masilotan ang mga opisyal sa administrative liability.
Bisan pa niini, giila sa DILG ang ilang limitado nga mga eksepsyon sa talagsaon kun mapugos subay sa kahimtang, lakip na ang mga kalamidad nga natural o hinimo sa tawo, mga emerhensiya sa publiko, ug seryosong hulga sa kaluwasan o seguridad sulod sa LGU.
Atol sa susamang sitwasyon, ang bisan unsang alternatibo nga lugar sa sesyon kinahanglan magbiling abli ug adunay access alang sa publiko ug sa tanang mga miyembro sa sanggunian.
Kinahanglan sab nga maplastar ang mga dokumento ug maapil sa opisyal nga minutes ang mga nahimong pagdugong kun proceedings.
Gihimug-atan sa DILG nga ang bise gobernador o bise alcalde isip mga presiding officer sa tagsa-tagsa ka mga sanggunian nga kinahanglan iapil sa pag-ihap sa quorum aron malikayan ang mga isyu nga legal subay sa bisa sa mga deliberasyon ug mga gipasa nga lakang.
Sa barangay level, ang punong barangay, isip presiding officer sa Sangguniang Barangay kinahanglan sab nga iapil sa pag-ila sa quorum.
Photo Courtesy:The pinoy OFW
