Gipahibalo sa presidente sa pilipinas nga sugod Abril 15, ipatuman sa Department of Transportation ang service contracting program alang sa mga public utility vehicle o PUV.
Ubos sa maong programa, bayran ang mga operator ug drayber og 40 hangtod 100 pesos matag kilometro, dugang sa ilang kita gikan sa pamasahe.
Ipatuman usab ang 20 porsyentong diskwento sa pamasahe sa tibuok nasod, nga makabenepisyo sa kapin 50,000 ka PUV, 1,000 ka operator, ug hangtod 15 milyones ka pasahero.
Giingon nga ang mga ruta i-angay sa mga linya sa tren ug dagkong bus corridor aron masiguro ang mas episyente ug kasaligan nga biyahe. Target usab niini ang off-peak hours ug gamitan og GPS monitoring ang tanang biyahe.
Dugang pa, adunay 10 pesos nga diskwento kada litro sa krudo alang sa PUV nga adunay maximum nga 150 litros matag semana sulod sa tulo ka bulan. Sugdan ang implementasyon sa National Capital Region ug palapdan ngadto sa ubang dagkong dalan sa nasod.
Matod sa presidente, tumong sa programa nga mapugngan ang pagsaka sa presyo sa mga batakang palaliton ug maprotektahan ang mga Pilipino.
Photo courtesy: Asia Times
