Giduso sa Securities and Exchange Commission (SEC) ang pagbag-o sa mga lagda sa online lending platforms pinaagi sa pag-lift sa moratorium ug pagpatuman og mas taas nga capital requirements.
Matod ni Francis Lim chairman sa Securities and Exhange Commission, kadaghanan sa stakeholders misuporta sa plano, ilabi na sa pagtaas sa kapital aron masiguro nga ang mga lehitimong kompanya lamang ang magpabilin sa industriya.
Sa kasamtangan, 1 milyon pesos pa lang ang minimum capital, nga giingong nakahatag og kahigayunan sa gagmay ug kulang sa kapital nga mga lender nga mahimong agresibo sa ilang operasyon.
Giingon ni Lim nga tumong sa bag-ong polisiya ang pagtangtang sa mga abusadong kompanya nga naggamit og dili hustong pamaagi sama sa kakulang sa due diligence ug pagpakaulaw sa mga nangutang kon mapakyas sa pagbayad.
Una nang gipahamtang sa SEC ang moratorium sa bag-ong online lending platforms tungod sa nagkadaghang reklamo batok sa ilang abusadong collection methods.
Bisan wala pa’y eksaktong petsa sa pagpagawas sa final nga memorandum circular, giingon ni Lim nga padayon pa ang pagtuon sa tanang komento aron masiguro ang balanse tali sa pagpanalipod sa konsumidor ug pagpasulod balik sa lehitimong negosyo sa merkado.
Photo courtesy: Malaya Business Insight
