Nagpadayon ang kagamhanan sa Sugbo sa Grocery Caravan initiative, nga nagtumong sa pagdala og mas barato nga mga palaliton ngadto sa mga bukirang barangay.
Sumala ni Cebu City Mayor Nestor Archival, padayon ang maong programa human sa unang implementasyon niini niadtong bulan sa Marso, ug karon mas mapalig-on pa kini pinaagi sa partisipasyon sa Metro Gaisano.
Gitakdang ipahigayon ang sunod nga Grocery Caravan karong Abril 12, 2026, alas 7:30 sa buntag, atubangan sa Cebu Technological University sa Barangay Babag. Giila ang maong lugar nga sayon duolon sa mga residente sa Babag ug sa silingang upland nga mga komunidad.
Gidasig ang mga residente nga sayo moadto tungod kay daghang mapalit nga mga nag-unang panginahanglan sama sa bugas, de lata, ug uban pang household items nga ibaligya sa presyong sama sa mga dagkong supermarket sa siyudad.
Pinaagi niini, makamenos og gasto sa plitehan ug adlaw-adlaw nga palaliton ang mga pamilya sa kabukiran.
Ang pagpadayon sa Grocery Caravan kabahin sa tubag sa lokal nga kagamhanan sa pagsaka sa presyo sa lana ug sa uban pa nga mga produkto. Pinaagi sa pagdala direkta sa mga palaliton ngadto sa komunidad, matabangan ang mga residente ilabi na kadtong maglisod sa pagbyahe.
Gipasabot usab ni Mayor Archival nga ang programa kabahin sa mas halapad nga tumong sa gobyerno nga mapaduol ang serbisyo ngadto sa tanang Sugboanon, ilabi na sa mga lugar nga lisod maabot.
Giawhag ang mga opisyal sa barangay ug lokal nga lider nga ipakaylap ang impormasyon kabahin sa iskedyul ug lugar aron mas daghang residente ang makabenepisyo sa maong inisyatibo.
Padayon ang Cebu City Government sa pagpatuman og mga solusyon nga nag-una sa kaayohan sa katawhan, aron masiguro nga ang serbisyo ug palaliton magpabiling duol ug maabot sa matag Sugboanon.
