Gipahibalo sa Department of Energy (DOE) nga wala nila gikonsidera ang pagpatuman sa fuel rationing scheme bisan pa sa nagkataas nga presyo sa lana sa kalibutan tungod sa tensyon sa Middle East.
Miingon si Energy Secretary Sharon Garin nga wala gyud gihisgutan o gikonsidera sa gobyerno ang maong pamaagi aron sulbaron ang epekto sa oil price hike.
Sa usa ka press briefing, gipadayag ni Garin nga dili pa apil sa mga plano sa DOE ang fuel rationing bisan pa sa mga pangutana sa publiko ug sektor sa transportasyon.
Sa laing bahin, mi-awhag si Senador Sherwin Gatchalian nga tan-awon sa DOE ang posibilidad sa fuel rationing isip paagi sa pagdumala sa suplay sa gasolina ug pagpugong sa hoarding sa panahon sa krisis sa enerhiya.
Si Gatchalian, nga nangulo sa Senate Committee on Proactive Response and Oversight for Timely and Effective Crisis Strategy (PROTECT), miingon nga mahimo kining temporaryong lakang hangtod mo-stabilize ang suplay sa lana sa nasud.
Samtang, gilauman sa mga motorista ang posibleng rollback sa presyo sa gasolina niining semana human sa sunod-sunod nga pagtaas sa presyo sa miaging mga buwan.
Base sa Mean of Platts Singapore (MOPS), gibanabana nga moubos ang presyo sa diesel ug Php5.50 hangtod P6.50 matag litro, samtang ang gasolina posibleng walay kausaban hangtod moubos ug Php1.00 matag litro.
Photo Courtesy: The Express Tribune
