Balik na sa pagdula ang NBA superstar nga si Stephen Curry human sa kapin duha ka bulan nga pahuway tungod sa iyang minor injury sa tuo nga tuhod.
Wala makadula ang 4-time NBA champion sulod sa 21 ka dula sukad niadtong Enero 30, 2026. Sa iyang pagbalik sa hardcourt, gipailalom una siya sa minutes restriction o limitadong oras sa pagdula.
Sa nahitabong dula tali sa Warriors ug Houston Rockets, wala nagmalampuson ang tinguha sa Golden State (GS) nga makuha ang daog bisan pa sa ilang pagpaningkamot sa ulahing bahin sa dula.
Gikuptan pa sa GS ang 5-point lead sa pagtapos sa unang quarter, 31-26, apan hingpit kining gibawi sa Rockets sa ikaduhang quarter pinaagi sa usa ka 29-22 dominant run.
Niabot pa sa 10 puntos ang labaw sa Rockets sa pagtapos sa ikatulo nga quarter, apan naningkamot ang 2022 NBA champion (GS) nga makabawi sa ikaupat nga quarter. Nakaya sa Warriors nga kuptan ang 1-point lead, 116-115, may 16 ka segundo na lang ang nahabilin sa dula. Apan, napasulod sa Houston shooter nga si Alperen Sengun ang usa ka layup, duha ka segundo sa dili pa mahuman ang dula.
Nisuway pa si Curry og usa ka stepback jump shot 3-pointer sa wala pa mahuman ang regulation, apan wala kini nisulod, hinungdan nga nahuman ang dula sa score nga 116-117.
Sa pagbalik ni Curry, nakasulod siya og 11 ka field goals—lima niini mga 3-pointers. Sa kinatibuk-an, nakatala ang NBA superstar og 29 points.
Nanguna usab si Kevin Durant sa kadaogan sa Rockets pinaagi sa iyang 31 points, walo ka assists, ug walo ka rebounds, apil na ang tulo ka blocks.
Photo courtesy: NBA
