Misaka ang inflation rate niadtong Marso ngadto sa 4.1%, ang labing paspas sulod sa baynte ka bulan tungod sa sunod-sunod nga pagsaka sa presyo sa lana dala sa nagpadayong gubat sa Middle East.
Sa usa ka press briefing, gitaho ni Philippine Statistics Authority National Statistician ug PSA chief Claire Dennis Mapa nga ang implasyon, o ang kapaspas sa pagsaka sa presyo sa mga produkto ug serbisyo, misaka sa 4.1% sa miaging bulan gikan sa 2.4% niadtong Pebrero 2026 ug 1.8% niadtong Marso 2025. Kini ang labing paspas nga inflation rate sukad niadtong Hulyo 2024 nga anaa sa 4.4%. Ang year-to-date inflation rate anaa sa 2.8%, nga sulod pa gihapon sa 2% hangtod 4% nga limit sa kagamhanan.
Matod ni Mapa, ang nag-unang hinungdan sa taas nga inflation ang Transport index nga nakatala og inflation rate nga 9.9% gikan sa 0.3% nga pag-ubos sa miaging bulan, ug kini adunay 54.8% nga bahin sa kinatibuk-ang pagsaka. Gipahayag ni Mapa nga ang naka-ambag sa mas taas nga ang-ang sa implasyon sa Transport niining Marso 2026 ang pagsaka sa presyo sa gasolina ug diesel, itandi sa pag-ubos sa presyo niini niadtong Pebrero 2026.
Partikular nga misaka ang inflation sa gasolina ngadto sa 27.3% sa miaging bulan gikan sa -5.7% niadtong Pebrero, samtang ang implasyon sa diesel misaka sa 59.5% gikan sa -1.3%. Nakatampo usab sa pagpaspas sa implasyon ang Food and Non-Alcoholic Beverages index nga misaka sa 3% gikan sa 1.8% ug adunay 26.9% nga kinatibuk-ang bahin. Ang implasyon usab sa Housing, Water, Gas and Other Fuels index misaka sa 4.5% gikan sa 3.5% sa miaging bulan nga adunay 12.7% nga bahin sa pagsaka.
Photo courtesy: Pay tax
