Patay ang usa ka Pinay sa missile attacks sa Haifa, Israel niadtong Dominggo, Abril 5, sumala sa Department of Foreign Affairs (DFA) Martes, Abril 7.
Sa usa ka pamahayag, gipadayag sa DFA ang ilang dakong kaguol sa kamatayon sa usa ka Pinoy nga nakabsan sa kinabuhi sa usa ka missile attack sa usa ka pinuy-anan sa Haifa, Israel niadtong gabii sa Abril 5, 2026. Nakalas usab sa pag-atake ang iyang bana nga Israeli ug ang iyang mga ugangan.
Gipahibalo na sa Philippine Embassy sa Tel Aviv ang pamilya sa biktima ug kasamtangang naghatag og tanang gikinahanglang tabang, lakip na ang mga proseso alang sa dinaliang pagpauli sa iyang patay’ng lawas bisan pa sa kalisod sa sitwasyon sa pagbiyahe sa rehiyon. Nakig-alayon usab ang departamento sa pamilya aron mohatag og suporta niining malisod nga panahon.
Nihangyo og pribasiya ang pamilya sa biktima aron makapagluksa og tarong. Ang DFA, uban sa tibuok komunidad sa mga Pilipino sa Israel, naghalad og pag-ampo alang sa iyang kalag ug alang sa kalig-on sa iyang pamilya niining panahon sa dakong kaguol.
Sa usa ka bulag nga pamahayag, nipadangat usab sa ilang pahasubo ang Embassy of the State of Israel sa Pilipinas ngadto sa pamilya sa biktima. Matod nila, nakigtambayayong ang Israel sa pamilya ug sa komunidad sa mga Pilipino sa pagluksa sa nawala nga kinabuhi.
Kahinumduman nga nakabsan usab sa kinabuhi ang Filipina caregiver nga si Mary Ann Velasquez De Vera sa Israel tungod sa nagpadayong gubat sa rehiyon.
Photo courtesy: One News
