Mokabat sa 300 ka mga Barangay Health Workers (BHWs) gikan sa nagkadaiyang lungsod sa probinsya sa Sugbo ang gipasidunggan atol sa pagsaulog sa Barangay Health Workers Day nga gipahigayon sa Cebu Provincial Capitol, adlawng Martes, Abril 7.
Ang maong kalihokan nagtigom sa mga frontliner sa panglawas alang sa usa ka adlaw nga pag-ila ug pagkat-on, diin gihingusgan ang usa ka seminar nga gipangulohan ni Servil Mae Vallespin, Regional Cancer Control Program Manager sa Department of Health (DOH 7).
Ubos sa tema nga “BHWs: Haligi sa Panglawas sa Barangay,” gipalig-on sa kalihokan ang mga edukasyonal nga diskusyon mahitungod sa nag-unang mga isyu sa panglawas lakip na ang immunization, pagtambal sa kanser, sayong pagdiskubre sa breast cancer, ug ang kahinungdanon sa pagpraktis sa luwas nga pakighilawas.
Gipasidunggan usab ang mga talagsaong BHW area coordinators ug mga dugay nang nagserbisyo nga health workers gikan sa lain-laing mga lungsod, diin ang ubang awardees nakaabot og hangtod 35 ka tuig nga matinud-anong serbisyo sa ilang komunidad.
Ang kalihokan giorganisa sa Provincial Health Office uban sa pakigtambayayong sa Community Health Workers Association of Cebu Province Incorporated, nga nagpalig-on sa padayon nga suporta sa probinsya alang sa iyang mga frontliner sa panglawas.
